ئێواره 
له سووچی په‌نجه‌ره‌‌ی ژووره‌که‌دا 
سێ که‌س 
مانگێک و دوو ئه‌ستێره 
بو ڕۆژئاوا ئه‌یانڕوانی
چاویان پڕ له جریوه‌ی فرمێسکی ماڵ‌ئاوایی
 کازیوه
له سووچی په‌نجه‌ره‌ی هۆڵه‌که‌دا
سێ که‌س
مانگێک و دوو ئه‌ستێره 
بو ڕۆژهه‌ڵات ئه‌یانڕوانی 
چاوه‌کانیان جریوه‌جریوی ئاونگی چاوه‌ڕوانی
 هاوار هاوار
هه‌تاوی ئه‌و هه‌سارانه
خۆ‌ره‌تاوی خاتوونی مانگ
پێش هه‌ڵاتن
پێش سه‌رکه‌وتن به سه‌ر شاخا
به کۆڵه‌بارێک پڕ له تیشک
به تیرێکی نامۆی غه‌ریو له پا ده‌رهات 
قه‌د هه‌ڵنه‌هات
هه‌ر ناته‌وه...
 به‌یانی
له سووچی په‌نجه‌ره‌ی ژیانه‌وه
سێ که‌س
مانگێک و دوو ئه‌ستێره
له فه‌راق و مه‌راقی خۆره‌تاوی بێ تاوانا
به ئارامی و به هێمنی کوژیانه‌وه!