ایشیم دئییل «سنی سئویرم!» - دئمک؛
گؤزلریم یاشلانار، اوره‌ییم دولار
اوره‌ییم اؤزونو یاددان چیخاردار
گؤزلریم گؤزونده اؤزوندن اولار...
بیرآزجا گئرییه آددیم آت، گولوم!
اؤزلویوم چوخدان‌دیر اؤگئی‌دیر منه
یئتر بونجا سوسماق، ایذین وئر باری -
بئینیمین آغریسین سؤیله‌ییم سنه.
بورادا اوز وئرن آجی اولای‌لار
بیلیرم دویغونو آیاق‌لایاجاق
بیلیرم بئینیمده قوپان فیرتینا
تکجه ساچ‌لارینی سوراق‌لایاجاق
ایچیمده بیر اوشاق قورخودان یالقیز
بیر عؤمور رؤیاما دالدالانیبدیر
گؤر نه‌لر یاشانیب ایچیمده منیم
اؤزلویوم مین یئره پارچالانیبدیر
ساغیم قاراباغ‌دا دوشوب تورپاغا
سولوم دا اورمودا دوزا باتیبدیر
دوشونجه‌م... نه دئییم... بیر عؤمور الده -
باها آلدیغینی اوجوز ساتیبدیر
بوراسی قارانلیق، بوراسی دهشت
هر آن بیر گول‍له‌یه توش گلیر اوره‌ک
هر آن ناغیل‌لاریم یالانا چاتیر
ن‍‍ه‌دیر بوردا دیلَک؟ آرزو نه دئمک؟
چئوریلدی اوزومه بیر-بیر سیلاح‌لار
تتیک‌لر بیربه‌بیر گئری چکیلدی
بیر داملا گؤزومدن آخدی تورپاغا
تورپاقدان من بویدا وطن تیکیلدی!
بورادان دونیایا دؤنوب باخیرام
تاریخه قارانلیق یولدور گله‌جک
بئله دوشونجه‌سیز حایاتدا آخی
منیم من‌لیییمی کیم گتیره‌جک؟
رؤیامدا ال‌لری تیترک بیر قوجا
دایانیب چلییه گؤی‌لره باخیر...
اؤنومده بیر اوشاق گولور اوزومه
باشیمین اوستوندن بیر اولدوز آخیر
