سونرا سن قالاجاغییدین
بوتون یاری قالمیش قالمیش‌لاردان
کیم اینانا بیلردی چیینیمده گئجه‌نی داشیماغیمی؟
اینانان وارسا، منه بیر سطیر ده اینانماسین
آینادا اوزونه «گوجلو اول» دئین
اوزونو دووارا توتوب آغلاییر
آغلاییر
قارالاییر هیچقیریق‌لارینداکی بوتون آدلاری
یومروق کیمی چیرپینیر
چیرپینیر قوش کیمی
بیز پنجره ایسته‌ییردیک
ندن بتونا راستلاشدیق؟
بیز سوناجایدیق بیر-بیریمیزه
کیمسه ایشلتمه‌ین کلمه‌لری
کیمسه آنلامینی بیلمه‌ین کلمه‌لری
دیلیم دیش‌لری چکیلمیش بیر ایلان کیمی آغزیمدا قیوریلیر
سئوگی سنه سونولان چیچک دئییلدی
چیچک‌لری کؤکوندن آییرماماق گؤزل اولا بیلردی
ال‌لریمیز چاتمایان اولدوزلاری بیر-بیریمیزه سونماق
بیر اوغلانین رمنس‌لری اولا بیلردی
اوره‌ییمده اؤلموش بیرینین نعشی اوستونده رقص ائدیر قیزلار
سن دئیه بیلرسن من یالقیز دئییلم
سن یالقیز دئییلسن
او یالقیز دئییل
بونو دا من دئیه بیلرم ان کسگین باخیشیملا
هامیمیز یالقیزیق، هامیمیز یالقیز
اؤلوم ان قیسا یول اولا بیلردی ابدی آیریلیغا
