شوءَ شوءه بارونی و یاد تو
کجا دادی بَکم دِ بیداد تو
تو بی مه خوشی مه بی تو پُر دِ غم
وِ کس عشق چَن مِه نکرده سِتَم
اگر غُصه اِمشو اَمونم بِیه
خُدا ره خلاصی نشونم بیه
گِری رِفته بارو اگر سا بکه
یه گر یادِ تو وا دِلِم تا بکه
دِ صو خومه دِ غم رها کردمه
اگر زِنه اینه فدا کردمه
زمین و زمونه و یک می زنم
وِ ری هر چی شاهه مِه تک می زنم
چی تاجی دِ مینه دو شیر اَر بویی
دِ چنگه عقاب اَر کموتر بویی
تونه وِر میارم چی بهرامه گور
اگر بیهَ دی ره روءم گور و گور
کَه عاشق همیشه بلاکش بیه
گذارش وِ آتش سیاوش بیه
تو ماهه منی آسمو هم تونی
تو عمره مِنی و زِمو هم تونی
إ ماهم إ عمرم زِمو آسمو
بیا تیرمه دِر نَکو دِ کَمو