به گوشِ کیچه تا پیـچه مُقـومِ زنگِ خَلخالِس
نپرسیـده مو إیدونم، یه ایلی وَسـته دُمبالِس

قِرّونِ گَرته لیـلَه  قامِ منِ دَسـدِس و إز آنی-
به دَورِ سـر دِر إیده إیلِنِـه وا  گیـلِ دَسمالِس

یه دیلـق  ناده من مـالا و با هَوگَردِ شولارِس
یه شهـری قِرقره شا ایکُنـه إی بال و اوبالس

دلِس تک حاکمِ  مِن دَو ، هشاره أر کُنه بُرگِس
ز  کینو تا دنـا دِر إیخـورِن ، دورِ تیا کالِس

ز زونی إیـرِّوه جاهل  ، لَته لُـه إیخوره عاقل
وُ شیخَم فُوتَسِ زی گِل و زی کُه ، بیده بَندالِس

کَووِه کالِ تیّس وَستـه به دینُـم ول کُنا نیدَک
بُرِّی بنده إز دلِ ایمون ، وُریستا بُنگِ دُندالِس

دِرا تَوری سرِ تَوری  وِجا خالِس  به کُنـجِ دل
بَسی شووَندِه رو  نِیـرِه ز ویرِم فِنگه یِ  خالِس