من گوڵە بەڕۆژە بووم
مل کز و سەر نەوی
تا خۆری چاوەکانت هەڵ هات
ئێستا سەربەرز و ڕو گەش
هەمو کاتم
ڕوم لە قیبلەی چاوی تۆیە
 من هەورێکی گرژ و مۆن بووم
وێڵی دەستی بای سەرگەردان
تا چیای تۆم لێ پەیدا بوو
ئێستا ڕووبارێکی بە هاژە و گڤەم
هیچ لەمپەرێ ڕێم پێ ناگرێ
 ساڵانێک بوو من دارێکی پیری گوێز بووم
ورەم بەرز و غڕە بووم بە خۆم
تا تۆی دارتاش منت ناسی
ئیستا تەختە نەردم و گەمەجاڕی دەستی مناڵ
 گابەردێک بووم لە دڵی بەرزی چیا
لە ئامێزی هەوری دڕا
پەڕەسێلکە هەواڵی هاتنی تۆی دا
بووم به ووردە بەردی جادە
تێک شکاوم ووردوو خاش
 پاییزێکی سارد و سڕ بووم
دەمار ووشک و ڕووم لە نامان و مەرگ بوو
دەنگی پێی تۆ
هەنگاو هەنگاو سەوزی کردم
بووم بە بەهار
دەشتێکی قاقڕ
ئێستا بوەتە گوڵ و گوڵزار