بو سؤزجوكلر هر شعرده گله بیلر
نه فرق وار او شعر یا بو شعر
آنجاق
منه قاتیلمالیسیز
“توتولماق “سؤزجویو اؤزو شعردیر
گاهدان بیر شی لرین دالیسیندان گئچمه لیسن
ساعات قاباغیندان یوخ
دالیسیندان
بیر ساری کیوسک تاپیلاجاق
ارگین دالیسندا بیر آغاج
اصلا نه فرقی وار
هرهانسی آغاجین باشیندا اولسالاردا
پاییزدا قارقالار سئویشمزلر
یارپاق دوشدوکجه سارالارلار...
قیش گلنده
قاریلدایاجاقلار
قار..قیش...قیر
ساری تلفون کیوسکلاریندا دانیشماماغیم حسرت
آغاجلارا چیخمادیغیم
پاییزدا سئویشمه مه ییم
دالی قاباق ائله سم ده ساعاتی
قاییتسام دا او” آن”ا
اما یوخ
او آندان چیخمامیشام کی هله
گاهدان چیخیرام ساعاتین اؤنونه
او “آن” منی یاخالامیشدی
قارقالار یان یانا دوزولموشدولر
نه قاریلداییر
نه
سئویشه بیلیردیلر..
...
منه قاتیلمالیسیز
“توتولماق “سؤزجویو اؤزو شعردیر
