سسیم گـرایلی‌دی، گؤیلوم شیکسته‌دیر، نازلیم
علاج ندیر کی یارام اوسته اوسته‌دیر، نازلیم
بو نرگیزیم، بو بنؤوشه‌م، بو حسرتیم …بودا من
قاییت …گؤزوم قولاغیم،یولدا، سسده‌دیر،نازلیم
آنـام بـاهـار، ایــاغ اوسته نــامـاز قیلا بیلمیر
کی سرو اوغوللاری قَددی شیکسته‌دیر، نازلیم
منیم سسیمدی بو قاتیل کیمی‌آسیلمیش ساز
منیم سسیمدی بو قوش کی قفسده‌دیر، نازلیم
بولاغ دئییل، گؤزو آغلار قالان اوشاقلاردی
چیچک دئییل گولوش آغزیندا پوسته‌دیر، نازلیم
دومانلانیر باخیشیندا سووال … آخی نه دئییم
سسیم گـرایلی‌دی، گؤیلوم شیکسته‌دیر، نـازلیم
