کتاب ها

Books

اشعار

poetry

صوت ها

audios

ویدئوها

videos

بیوگرافی

متولد ۱۳۶۶، تبریز.  مجموعه‌ی منتشر شده: «دلی‌لردن قالان سطیرلر»

هردن بوش-بوشونا اوتوروب

هردن بوش-بوشونا اوتوروب
داریخماقدان دا داریخسان،
گئجه‌ بوی‌لارینی آددیملاسان سس‌سیز،
سیگارا ایسته‌ین‌لرله دانیشماق ایسته‌سن،
بیر تئلئفون سسینی گؤزله‌ییرسن دئمک 
مدرن منجی‌نین سسینی!

آچ کؤهنه ماهنی‌لاری رادیودان!
بیر قوجا ائوین‌ده اؤیرندیم بونو:
رادیولار یالقیزلیغین سونو...
سونرا جئب تئلئفونون‌لا اوغراش!
توت بیر-ایکی دوستونون نؤمره‌سینی!
سایمازیانا دانیشسالار دا
تانیماسالار دا سسینی،
داریخما!
بیر فیلیم‌ده اؤیرندیم بونو:
بعضن اونوتماق‌دیر حیاتین یولو...

باشینی بیر شئی‌لرله قاتسان دا
ایزله‌سن ده یوروجو خبرلری،
رئکلام‌لار اؤزونو ساتدیرماغا، باشینا دولانسالار دا
بیرآن تئلوئزیونو سیندیراسین گلیر!
هاوا خبرلرینی پوزماغین!
بوتون هاوالاری بولودلو ایسته‌ییرسن،
بوتون گونش‌لری باتمیش...
بو گئجه سیگاران دا قورتاراجاق غفیلدن!
جئب‌لرین فاحشه‌لر تک سویولماسا بیرینه
یئنه سئوینمه‌لیسن!
دئمک حیاتدا دا سئوینمه‌یه بیر شئی‌لر وار...
اوتورموشام قارانلیغین اورتاسیندا،
ال‌لریم آزاد... ال‌لریم کپه‌نک...
کلمه‌لر آخان اولدوزدور بئینیمده؛
هر شئیی آیدینجاسینا گؤره بیلیرم،
هر شئی چیلپاق...
نه راحاتدیر ایچ‌لرینیزی گؤرمک، دوست‌لار!
نه راحاتدیر خیانتینیزه توخونماق!..

چاخیلیر فنده‌ییمدن بیر ایشیق،
یانیر سیگارام، آچیلیر رادیو
دولور قولاغیما یالقیزلیغین سیمبولو!
آغلاییر باجیم،
اوره‌یی اوزولور آنامین...
آتام هاوا خبرلرینی ایزله‌ییر:
«صاباح بولودلارین اعتصابی‌دیر،
صاباح یئنی اوشاق‌لارین اؤلوم واختی‌دیر سوریه‌ده
صاباح اوکراین، آفریقا...»
صاباح سن، من، سئوگیلیم...
صاباح هامیمیزین اؤلوم ضیافتی‌دیر...

مرتضی سلمانی