لە توێ توێی هەزار توێی هەزارویەك شەوی شەوانی منا ژیاویی و
هەزارویەك شێعرم لەتوێ توێی هەزار توێی
ئەم شەوانە بۆ نووسیویی
شەهرزاد!

شەهرزاد!
تۆمان لەخەوی بەشكۆی هەزارویەك ساڵەی سەردەمانێكی شكۆدار هەستاند
من شاعیرێكی شەوبێژی شەوانەی ئەم شەقامانەم و
لەوەتەی نازانم بۆ مرۆڤەكانی ئێرە فریای ماڵاواییەكی ساناش ناكەون
شێعر بۆ با دەنووسم.

شەهرزاد!
لە شكۆی شەڕەفی شێعر مەگەڕێ
ئێستە سەردەمانێكی ترە
ئێستە شیرین بۆ ئەوەی لە فەرهاد جیا بێتەوە
لەگەڵ دۆستە كوڕە نوێیەكەی بۆ سەفەر چووە و
لەیلیش بۆ ئەوەی مەجنوون لە بیر بكا
لای دوكتورە دەروونناسەكەی دەمێنێتەوە و
عەشق چارەنووسی هەزارویەك هێندەی دۆخی من نادیارترە.
 ئێستە ئیترهیچ چیڕۆكێ خۆی لەبەرینیی ژیان نادات
هیچ ژیانێ بە دەروازەكانی هەرمانی عەشق ناگات
لێمان ببوورە كەوا هەر پەتیارەیەك دەبینین
بەناوی تۆوە بانگی دەكەین
شەهرزاد!.