ئێمە دوو سوورپێستین
یانی لە دوو سوورپێست دەچین
ئەو ئەوندە جوانە
جوانییەکەی مرۆڤ دەخوات
من پێی دەڵێم
سێبەرەگورگ
من هەر کاتێ کە دەیبینم
دەنگم هەتا قووڵایییەکانی وڵات دەڕوات
ئەو پێم دەڵێ
گورگەشێتەی چیای ئەستەم.
ئێمە بڕیاڕمان وا بوو
قەت دەستەمۆ نەبین
هەر بەتەنیا لە بەرزایییەکانەوە
لە خەڵکی بڕوانین و
هەر کاتێ لێک دوور کەوتینەوە
ئاگرێ داگیرسێنین
دووکەڵی لە ئاسمان خەین.
ئێمە دوو سوورپێست بووین
یانی لە دوو سوورپێست دەچووین و
ئێستە من تەنیا لە بەرزایییەکانی چیای ئەستەمدا
ئاگرێکم داگیرساندووە
دووکەڵێکم لە ئاسمان خستووە.
