قاییت قاییتمالی قئیلیم-قالیم، آی آغرین آلیم
قاییت آ سئوگیلیم، آه سئودالیم، آی آغرین آلیم
قاییت قاییت کی ائوی-ائیوانی سیلیم-سوپوروم
دوروم سماوره ده اود سالیم، آی آغرین آلیم
بولاق-بولاق ائله سنسیز قیزیل قان آغلامیشم
چیچکلی باغچا اولوب دستمالیم، آی آغرین آلیم
باهار-باهار بزهنیرلر تزه گلین تزه بئی
پاییز-پاییز پوزولور احوالیم، آی آغرین آلیم
دونن منی گؤرهن آینا بوگون داها تانیمیر
قاییت آغاردی ساچیم ساققالیم، آی آغرین آلیم
داها منی تویادا دوستلاریم چاغیرمیرلار
کی قالماییب داها تویلوق حالیم، آی آغیرین آلیم
باری ساچیندان ایکی تئل قیریب منه گؤندر
کی بیرجه کسمه شکسته چالیم، آی آغرین آلیم
باشی قالیب قانادی آلتدا نه دینیر نه ایچیر
یئتیملشیبدی خیال قارتالیم، آی آغرین آلیم
منی ائوین بو دومانلی سکوتو سینسیتدی
قاییت قاییتمالی قئیلیم-قالیم، آی آغرین آلیم
