آخار سووام یئل اولوب یاتماقا یارانمامیشام
قاشیق کیمین آرانی قاتماقا یارانمامیشام
تیکان تک ال آیاغا باتماقا یارانسامدا
پیچاق کیمین اوره یه باتماقا یارانمامیشام
منی سنه یارادان دردی ده منه یارادیب
بو آل وئرین لذتین ساتماقا یارانمامیشام
یولون سونوندا چوخی شانس آتیر چاتیر اوزونه
اوزون یولام اوزومه چاتماقا یارانمامیشام
قیزیل دا اولسا قیزیل گولده کولده اوز یوکومو
اونون بونون دالینا چاتماغا یارانمامیشام
داش آتماغین سوزونو شاعیرم آتا بیله ره م
سوز آتماغین داشینی آتماقا یارانمامیشام
بولود اولوب اوزومو آغلاسامدا من سن گول
آماندی آغلاما آغلاتماقا یارانمامیشام
یارانمیشام کی اجاق تک یانام یانام کول اولام
نه اولدوزام نه ده آی باتماقا یارانمامیشام
منیم آدیم قانادیم فریادیم دادیم کیمی دیر
ناغیل کیمین آدام آلداتماقا یارانمامیشام