اوچماق اوچون 
                هانکی گؤیون آلتیندا قالمالی‌یام؟!
                نئچه بولودون گؤز‌یاش‌لارینی قوروتمالی‌یام؟!
گئجه‌نین لاپ قارانلیغی‌دیر
بیریسینه ده سالام وئره بیلمه‌میشم هله‌دیر
قیرمیزی دوشونجه ده ائوه قاییتمادی
یورغان‌لاردان بتر یورغونام
                          آنام!

یاشاماق اوچون نه‌قدر اؤلمک گره‌کیر؟!
آییق‌لیغیمی بایقوش یئدی،
خوشبخت‌لییی نئجه اولدو اونوتدوم،
                              بیلمه‌دیم...
هه!
آبا دئیردی:
«ملیک ممد داغ‌لاردان کئچیردی، گدیک‌لردن، 
                     آت اوستونده... قارانلیق‌دان...
اوچ گیردکان اووجون‌دا
هر بیری‌نین ایچینده بیر حوری-ملک قیزی
قیز چیخدیغیندا
سو وئره‌یدی گرک، بیر ده یئمک...»

ائله او ایدی خوشبختلیک دئمک!
منیم نه سویوم اولدو،
          نه چؤره‌ییم...
آنا، او قدر قورخموشام کی، قورخمورام داها قورخماق‌دان!
آنا، اینان،
         داها قورخمایاجاغام سنی خاطیرلاماق‌دان!
باخ بوی-بوخونوما! بؤیوموشم...
           آزادلیق‌دان دا دانیشیرام!
گؤره‌سن هانسی بارماغیمی کیبریت چکیم
            بو کؤزو آلوولاندیرماق اوچون؟!
آما یوخ! 
اونوتموشدوم دئیه‌سن،
             بارماق‌لاریمین نئچه‌سینی آپاردیلار بارماقلیغا
             بیرینی بانک‌دا ضمانته قویدوم،
             بیری الیمدن دوشدو 
                      نه بیلیم هارا!
              قالانی‌نی تیکه توتدم اونا-بونا!..
آنا، باغیشلا!
قاییداندا منه بارماق گتیر زحمت اولماسا!
ایز بوراخمالی‌یام دونیایا،
دوغروسو گله بیلمه‌سن،
          اؤلمه‌یه نه‌قدر یاشاماق یئترلی اولار؟!