تکجه ترن‌لر، اوتوبوس‌لار قاپی‌لارینی آچدیلار اوزومه
تکجه خیاوان‌لار ایذین وئردیلر کئچمه‌ییمه
نه آنام اولدو دردلریمی سؤیله‌یم باغرینا،
نه آتام اولدو سؤیکه‌نم قایالیغینا...

گؤردوک‌لریمدن 
              یالنیز یاغیشی سئودیم
نه سسیندن قورخدوم،
نه ده گلمه‌سیندن.
ایلک توخوندوغوندا منه،
ایل‌لر اؤنجه 
اونودولان، بورگه‌لنمیش بیر کوچه‌ده‌یدیم
                        تبریز کوچه‌سینده‌یدیم
ایکی دووار آراسیندا
اوجا،
و پنجره‌لری آز قالا قاناد توتا
بیری یاشاسین دئیه سرت دایانمیشدی
بیری اؤلوم اولسون دئیه
کئچنمه‌دیم هئچ بیریندن!
سیندیم 
          قوم ساعاتی کیمی،
          سوورولدوم زامانین کور دؤنگه‌سینده...
نه یومروغومو توپلایا بیلدیم،
نه ده دوداق‌لاریم‌دا گولوشو
یالنیز سئرچه‌لره باخدیم
            مئیدان اوخویارکن آزادلیغا
یالنیز یاغیش توخوندو 
بیر ده یارپاق‌لاردان ائنن پاییز...

کلمات کلیدی : شعر | مجله شعر |

 شاعر : آرش ساعی
سایر اشعار این شاعر