گئدیرم دئدیم
ال‌لریم قابار 
باشیم توز-توپراق...
ندن؟ سوردو
پالتوسونون دویمه‌سینی باغلایارکن
اوشودوم!
گئجه‌لری اؤز-اؤزومه دانیشارام دئدیم
جوراب‌لاریم پیس قوخار
آغلارام گولرم
ندن‌سیز
گونده 5-10 مینه ایشچیلیک گؤزلرین کی هئچ
قارنیمی دا دویورمور
گئدیرم دئدیم
تبریز آجییدی
قارنینین قورولتوسو قولاغیمی کار ائدیردی

دیرناغیما یووالانان بیر پیشیک وار
هر آخشام اومودسوز اوزومو جیرماقلار
اوشویورم، آجام دئیر
سس‌سیزجه بیر مرسدس یانیمیزدان کئچر
توستوسون بیز ایله پایلاشار
جیرماقلاماغی بوشلار
بیزه یاراشماز دئیر
مارکالی تیشرت‌لر گئیمک
«قادین یوخوسو گؤرمک»
پرشیایا مینمک
آغلایار 
یالوارار
آجلیقدان بالاسین یئیه-یئیه
آغلاما 
 آغ/لا/ ما دئیه-دئیه
منیم بالام اولمامالیدی
آنلاسانا
قولومدا قورشون آغیرلیغی وار
گئجه‌می بالاسین یئین پیشیک‌لر آغلار
ال‌لریم جاهازسیز قاریمیش قیزلارین
تیترک سسی‌دیر
فرقینده دئییل سوتییَنی نه رنگده اولسون...

گئدیرم دئدیم
گوزلریم قیزارمیش
باشماق‌لاریمین جیریلماغینا نئچه آددیم قالمیش...
ندن؟ سوردو
باشماق‌لاریما اویارکن
اوتاندیم...
گؤزلریم نئچه تاریخ اویانلیق دوشموش
- نییه؟ دئین بیر قادینین کسیلمیش دؤشونه
من بیرین آختاریرام کؤلگه‌مه دایانیب
 - نییه؟ باغیرسین
سن ایسه بیر کؤلگه اویوماق اوچون
آیاغیم تاریخدن اوچان یوخودور
اینان
...
کؤلگه‌م بیر اوغلانین
حامامدا بوغولان وسوسه‌سی‌دیر
سئوگیمی آنلاماق چتین
نفرتیمی دویماق
هئچ تانری سوچ‌لاریمی باغیشلایا بیلمز!
سویوق اولورسا بیر آخشام
اوشوسن
پالتوم یوخدور سالام چیینینه!

گئدیرم دئدیم
کؤلگه‌م اؤگئی بیر شهوت کیمی اوزونه دوشموش
ندن؟ سوردو
ساچ‌لارین چیینینه آخیدارکن
گولدوم...
چوخ شئی‌لر دَییشیلیب دئدیم
بِنلادن اؤلوب
صمد اونودولوب
سن منی سئومیرسن!
سنین یاتاغین یوخولودور
منیم گئجه‌لریمسه
سسلی
نعشه‌لییه دالدالاندیغیم آخشام‌لار
اؤنجه ایشچی‌لر توپلانار بئینیمده
بیریسی سولچو
بیریسی ساتقین
بیریسی یاپراق اولوب آسیلار آغاجدان
بیریسی یاسلانار اونون کؤلگه‌سینه
سونرا بئنیمین بیر کُریدوروندا
قاریمیش بیر قیز بزکله‌نر
پالتارسیز لیمان‌لاری گزر
سونرا آرازلیغیما گلین گلر
بیر گولل‍ه قولایجاسینا قیزلیغین درر
قولومون اوستونده
سسیم اوجالدیقجا نبض‌لری سوسار
سونرا ابوریحاندا بیر چمن شئهی نعشه‌لیییمی آییدار
ییخیلمارام دئیه آددیملانارام خیاوان‌لاری
بیر ماشین سیقیناللانار قولاغیمدا
ایتی وورسان بو سویوقدا ائشییه چیخماز دئیه
سونرا خیاوان اولار اؤنومده...
بلکه 6 ایل سونرا فیس‌بوکدا گؤررسن آدیمی
دانیشاریق
- داها سیگارام هشیش یوواسی دئییل
یالقیز دئییلم 
چالیشیرام دئدیییمین
یالان اولدوغونو بیلیب گولرسن...
ائوینین لوکس اولدوغونو دئیرسن
قیزینین نه قدر سنه بنزه‌دییینی
دوغرو اولدوغونو آنلاییب آغلارام
یقین بیر ماشینیم اولار
آنجاق
پاریس‌ده اولدوغونو دویارام
6 ایلدن سونرا دا
ماشین‌لا پاریسه گلمک اولماز بیلیرم!

 
آیریلیرام دئدیم
گله‌جه‌ییمی کؤهنه بیر سلاح تاققیلدایارکن
هئچ «ندن؟» سورمادی
جیب تئلفونو زنگ چالدی
دوداغی قاچدی
گؤزلری گؤزومدن قاچدی
ال ساللاییب گولومسه‌دیم آردیجا اوزاقلاشدی...