بو گؤی اوزو بوم‌بوشدو
بو یئر اوزو بوم‌بوشدو
من هله آختاردیغیمین نه اولدوغونو بیلمیرم
او اوزدن اؤزوم ایتیرم اولمایان‌لار آراسیندا
بو یئر اوزو ایله گؤی اوزونون آراسیندا قوش‌لارا سلام اولسون!
آی انسان! سن هارالارا یوکسلسن ده، گؤمولمک حالینداسان بونو اونوتما!
کئشکه بیردن-بیره کئچمه‌یه‌یدیک توپراق آلتینا
کئشکه عمرومون ایکینجی حصه‌سیندن باشلایایدی یئره کئچمه‌ییم
ایلده بیراز آغاج اصلاتی کیمی
آی یئر اوزونون ایتمیش سرخوشلوغو!
سنی کیم تک‌باشینا، باشینا چکدی؟
یئر آلتی دئولر‌می؟ یا گؤی اوزونده‌کی دئولر؟
بیزه بوشلوق‌لار پای قالدی
گؤی اوزونده‌کی قوش‌لارا سلام
بوش‌بوشونا اوچوش‌لارینیزا سلام!
آما بو بوشلوق دولان دئییل
دولولوق، یئر آلتینا عاید بیر فعل‌دیر
قونون مزاریمداکی اولمایان دن‌لره
قونون، آغیت اوخویون منه
قونوب دا باشیما چالین اوچماق فعلی‌نین سیزه عاید اولدوغونو.
بیز آدام‌لار ، آددیملامیریق بو یئری
سورونوروک اوندا
چونکو سورگونوک
گؤی قوش‌لاری سلام اولسون سیزه!
دولماق بیز آدام‌لار اوچون دئییل
دولماق یئر اوچوندور
دولدوغوم داشین آلتینداکی یئر
سلام اولسون سنه...
