شاباش دیگر ءِ گْوات! بْیار نی گل ءِ پیام ءَ
ساه ءَ وتی کنیں ندر، پہ دلربا ءِ نام ءَ
چو کُهسَرانی کبگ ءَ بوت‌اوں گنۆک ءُ سِرّی
درمانے من نہ‌دیست‌اوں اندوه ء بےسُدام ءَ
اَرسے شلێنتگ‌اوں من، تی دوری ءِ غم ءِ تا
دل نی چو مُرگے ٹپّی، کپتہ غمانی دام ءَ
انچو خیال ءِ مُرگ ءَ ارواه ءَ سِست ءُ بُرت‌ئے
رێشێں دل ءَ نی سُهت‌ئے گوں غمزَوانی زَهم ءَ
زْیانبودێں واهگان پہ زۆرانسری من ءَ سُهت
چو جمبراوَ گْریئین، شَہ آسمان ءِ بام ءَ
تا مرک ءِ درگت ءَ من، تی انتزار ءَ مانین
زانین کہ رۆچ دَرَ یِهت، بِہ انتزار ءِ شام ءَ
بے نام ءُ بے نشان اوں، دلبر تئی گَلی ءَ
نام ءُ دپ ءَ کپین من، داستان ء ناتَوام ءَ
بُڈّێنتگ‌ئے من ءَ را دوری تہ ءَ بوت‌اوں مێن
رۆچے رسیت کہ چَشّین؛ لالێں دپ ءِ تی تام ءَ