خۆمیش نازام ئەرا دی رۊ لە ناو ماڵەکەت نێیرم
ئەرا دی من جگا لە بەزم و قڕم و قاڵەکەت نێیرم
دەست گردم لەلیم گردی غەزەو من مامە ماتەڵ کی
ئەرا هیچ مۆقە من قەدری وە قەد خڵخاڵەکەت نێیرم
چەوت وەختای ئەگیرستی ، سڕیم ، لادای دەسم یانی
لە بەر چاوت ئەزیزم ئەرزش دەسماڵەکەت نێیرم 
وەتی وەل یێک وەڕی ناچین ، منم بۊچک تونی گۆورا
دە وەختای عاشقم کاری وە سننو ساڵەکەت نێیرم
وەتی چەس ئارزووت ؟ چۊن بۊژمەی کی من خیال تر
دویای ماچ کردن دەمچاو و گووپ و خاڵەکەت نێیرم
وە ئوممید وساڵت خۊن ئەگیرم نیمەشەو ، کی من
وە شەوقەو چاو وە رەختاوپیچ بان هەڕزاڵەکەت نێیرم
لە سەر یێی سەخرە دانشتیتە ، دۆورت پر لە گورگ و من
ئەرای هاتن ، دە وێرستن وە لای سەر یاڵەکەت نێیرم
دەم هەرکەس ئەکەیتەو ، جک تون و بک تون تەواو ئەوژت
فەقەت باوەر کە من ئەسڵەن خەوەر لە حاڵەکەت نێیرم
من ئادەم بیم تونیش حەووا ، وە یێی سێیفەو لە ری دەرچۊم
چە بی کی ئیستە حەتتا بووی سێیفە کاڵەکەت نێیرم