سئوگیلیم!
ایندی دن دئییرم
شئعیرین عمودی مئحوری دیه جک بیر بیرینه
ساچلارینا مئدیترانه یئل لری اسنده
«کور اوغلونون گؤزو قارا سئچنده
قیر آتینی مینیب کسیب بیچنده
من ده بوردان تئز مطلبه چاتمارام
ائیواز گلیب چاتمایینجا یاتمارام» سن یاتماسان
بو شئعرله داوام لاناجاق سان اگر
بیرآن گول
قوی شئعرین هارمونی سی نا چؤپ قویان اولماسین
«داشلی بولاق داش ـ قومولا دولماسین
باغچالاری سارالماسین ـ سولماسین
اوردان کئچن آتلی سوسوز» اولماسادا
گؤز یاشینلا بو سطیرلرده سوواریرسان
و گؤزلرینی یوماندا
شئعیریم کافکانین حیکایه لرینه بنزه ییر
قارانلیقدا اوخوجو «گره گوار سامسا» اولماقدان قورخور
قیشقیریر
منی «چاغیریر/آم گل هارالاردا قالمیسان
منی اینجیدمه»ی ایسته مه سن
یئنی دن گؤزلرینی آچ
سؤزجوک لرین آراخاسنیدان
گؤزلریمه دونوخ
قؤی دیلیم توتولسون
شئعرین قالانینی یازا بیلمه سم ده
اوغورلوق الیمدن گلر
اصلن کیم کیمه دی
بو «سیبی که در نگاه تو می‌چرخد» منیم دی
فارس لارین باغیندان درمیشم سنین ایچین
مه یر «رابین هود» دان نه ییم اسکیک «دیر/سه خان اوغلو بوغاج»ام.
اینانمیرسان؟
اینانماسان منی دده قورقودون واتیکان نسخه سیندن آختار
تپه گؤزون گؤزوندن
دلی دومرولون کؤرپوسوندن ـ فیلمیندن
آخیر پرده سیندن
و یئرسیز یئرده کات وئریلمه دن
کات!
بو سکانس دا سندن کوسمه ییم گلیر
آدیمی موبایلوندن اونود
و تقویمین بوتون سه شنبه لریندن/ گمی جورالآت بالیقلی چایا.
آنا تومروسون
قیرمیزی شئنئلی‌نی چییین لرینه
سال
قال
عرشه نین اوستونده
شوارابیل دن نفت داشییان گمی لرین آردینجا گئت
سنه یول گؤسته رر لر
اورسییه ته گئدیرلر
اورسییه ت دیینده گؤیلومه وودکا
دوشور
چیخیر
یادیمدان
ترکمانچای عهدنامه سی
سن پطرزبورگی سئویرم
تولستویون ساققالین
داستایووسکی نین قومارخاناسین
«پولینانی» گؤرنده سنه اوخشادیرام
ومایاکوفسکی نین شئعیر لرینی میزیلداییرام
«سنی سئوی یوروم
مارییّا ـ مارییّا» هارییا؟! هارییا؟!
دییه سن چاش ـ پاش وورورام
کات!
بوسکانس هله یازیلماییب
نه بیلمک
بلکه بیر گون ماسکو خیاوانلاریندا
اوز ـ اوزه گلدیک
و بوتون سه شنبه لرین حورمتینه
سالام لارین ضامینینی اوره ییمزده چکدیک...
اوچ
ایکی
بیر
بامب
کات!
یوخ یوخ یوخ
اصلن بو سکانس مئلودارم اولمالی دیر
سالام لاریمز دیله گلر
سن قوللارینی منیم بوینوما دولایارسان
ومن سنین دوداقلاریندان...
قالانینی سانسور ائتمه سه ایدیم
آدیمیزا سؤز چیخارداردیلار
ائله بو پئلان دا گرک
رشیدبهبودُفون اوخوماق سسی گله
تصویر اوزاق لاشا
و
شئعیرداها بوردا قورتاریر
کات!
