هەڵدەچمەوە بە خۆما و
دووبارە
 لەم خەوە گرانەی لە خۆتا گرینە
 دەرتدێنم...
جارێتر
هەڵتەچنێمەوە بە شێعرا و  ئەتکێشمەوە نێو دڵی ئەم تاریکستانەی لە منا ڕواوترە و لە تۆ تەوەلاتر
تاڵ... تاڵ... تاڵێکیش بە گەردنمەوە
 دەورت و 
دووریت و 
تەنیاییم ...
 گێژ ئەخوات سەری من لە
لە گێژەنی دوڕیانێک 
  دوور ئەچێ و 
دوورتر من 
بە گۆشەیەکا کە دیوارە و کز کز  کزێنیم کزتر ئەکەم و
 [ئەم سوتانە ئەگەر کۆتایی شەوم بێ یان ئەم شەوە بە دیواریا بشکێ و یان تۆ بێیتەوە و من هێشتا لە تاریکستانی خۆما تاساو 
 چیها پەنجەرەمانی
 لە خۆیا ڕەش کردووە]
 شکانی جاڕ داوە شەو لە گیانما
 دەرئەچێ لە خۆم و 
 پڕ بە هەزار پێست
 ئەشکێم
 ئەکشێم
 تا هەزار گیان بە جەستەیەکەوە
تا هەزار خۆزگە بە دڵێکەوە 
هەزار شێعر بە لقێکی گیانمەوە 
 تاوەتا
سوور... شین ... ڕەش... سپی
حەل نابن و 
لە جەستەم ئەچنەدەر
پێست شێتاڵی 
تیتاڵی دێ 
بە کلاسیکی ڕەنگەکان
بە پەنجەرەوە
 دیوار رواوە بە مندا و
 درەوی ئەو نێرگزانەی وا 
 بەهاریان بۆن کردین هەر ماون و 
بە نارنجی ژنانەییم 
بەو ئەستێرانەی شان
لە گوڵەکانی کراسەکەم ئەدەن 
.
.
.
بە قاچاخی
تا قاچەکانم سوور
ئەمانزڕێنن
و شین لە خەوەکانمانا
باوێشک ئەدەن
تا ماچێ کە دزیمەوە لە کراسەکەت
و تا برینەکانی لاملی دیواری خوا و 
ڕمانی ڕم ڕمی ئەسپەکەی ئادەم و ـ حەوایش خۆم ـ
حیلەی  هەموو ئەو ترسانە و
زەجرت ئەکێشم و
 ئەپێچمە پێستێ ڕەهەنداو
 هەمو ئەو خۆفانە لە ڕەشدا
تف ئەکەمەوە
پیت بە پیتی ناوەکەم  شۆڕشیانە
 لە سەرتا و
 دەست بەسەر ئەو وشانەی 
 ناخەون و زڕاون لەم شێعرەدا
 و لە سەر  ڕێگای
ناهەمواریت سوور ئەبن 
چرایەک دامگیرسێنە
لە شەوی شەرابیتا 
لە گەروی ترێ و زاری
شێعردا وەکوو مۆمێکی لە دایک بوونت...
.
.
.
چاو
چاوم چۆن تماشات ئەگوشێ و
 قەراری  قومێ شەرابت 
خەست خەستتریش
دیوارم بزڕێنێ و 
لە چاوما سوور 
سوێر
مەستیت ئێش ئەکەم...