...
سنسیز بو كؤنول اى گؤزهلیم شاد اولا بیلمز
ویران ائلهسن عشق ائوین، آباد اولا بیلمز
عؤمروم كئچیب امّید وصالیندا عزیزیم
یاد ائیله منى، یارلارا یار، یاد اولا بیلمز
گر وصلیوین اى گول، اولا جان نقدى بهاسى
وار ارزشى، عشقیم ولى برباد اولا بیلمز
گول طلعتیوین رنگى گولستاندا تاپیلماز
قدّین بویوجا، قامت شمشاد اولا بیلمز
زولفوندى كمند، ابرو، كمان، مژگانین اوخدو
دن خال لبیندیر، بئله صیاد اولا بیلمز
هر كس وورا دم عشقدن عاشق دئمك اولماز
باققال دا نوغول گر ساتا، قنّاد اولا بیلمز
عشقینده اگر اولماسا اخلاص و صداقت
توفیق وصال عاشقه ایجاد اولا بیلمز
هر كس دئسه گر عشقده فرهاد زمانم
گؤسترمهسه گر سَعیینى فرهاد اولا بیلمز
فرهادین آدین دیللره اؤز تیشهسى سالدى
فرهادلیغا كى تكجه گؤزل آد اولا بیلمز
عاشق اودو جاندان كئچه معشوقو یولوندا
بُرهان وفا داد ایله بیداد اولا بیلمز
توصیف ایله پائیزه بهار آدى یاراشماز
گول وئرسه ده آذر آیى، خرداد اولا بیلمز
ذاتیندا، شكر شیرین اولار، دوز شور عزیزیم
ایستوت آجیدى سؤزله شیرینداد اولا بیلمز
شاگرد اولان اوّلده، مسّلم اولار استاد
مَكتبده تلاش ائتمهین، اوستاد اولا بیلمز
سعى ائیله سوروش حَل اولا انواع مَسائل
قورخما بو سوروشماق سنه ایراد اولا بیلمز
هر مَملكتین پایهسى بنیانیدى مكتب
مكتبسیز اولان مَملكت ارشاد اولا بیلمز
هر مملكت علم ایله اگر اولماسا تجهیز
ذلّت قفسینده یاشار، آزاد اولا بیلمز
شاهد مگر احساس آنادان سنله دوغولموش؟
هر كسده بئله ذوق خداداد اولا بیلمز.
