هات لەشارەیلْ شەڕفرووش دەوانچە
کەفتە دەسْ خێڵ چەکمەپووش دەوانچە
هەرکە تەکان خوارد زۊ وەیەێ تەقە کوشیا
نەیشت لەئێ دەروەنە خەرووش دەوانچە
هاتێیە تا دی کەسێ وەدەیشت نەنووڕێد
خەێد ورەو دەروەچْ هڕووش، دەوانچە
هەر دەفە کەفتەو دەسْ کەسێگ لە یەێجا
چەکمەسیە، بێوەفا، چەمووش، دەوانچە
هەم خوەرْ بێخەێر هاتەبان و قەرارە
گیان بسنێدن وەیەێ قرووش دەوانچە
هسکوتە مەردم! هەناسْ قۊل نەکیشن
یەێ گڕ تر هەم تییەێدە هووش دەوانچە
بێکشە بانوبچن ک مەرگ نزیکە
دی دەنگدان ناێد، ها وەگووش دەوانچە
