نه غزل آغلایا بیلدیم گؤزو یانمیش بولاغا
نه ماجال وئردی آغیر بورکو غزل آغلاماغا
تؤکدولر آغزینا قاینار قیری، چینقیل قاریشیق
نه الیم چاتدی چکه م نعشین اقلّن قیراغا
خییاوان سیینه سینه چیخدی دمیر وَردنه لر
یئل، بولاقدان ساری، باش ساغلیغی گؤندردی باغا
دیلله نه بیلمه دی بیر کؤیشن آغاجدان بیری ده
بارماغین شکله ییب آلچاق دره، هوو چکدی داغا
اسمه جه دوشدو، آیاق-باش دوشن اورمان جانینا
بو گورا دؤندو، اتکدن باشا، باشدان آیاغا
شاختا پایلاندی و هر یاپراغا بیر قیش یئتیشیب
سونرا، بایقوش چیچهیی چؤکدو چوروک قول بوداغا
بولدوزئر یوللادیلار، آردیجا بیر کاچ تَکَنه
مین دؤیوشلوک شهیدی، بیر مزارا قویلاماغا
تاپشیریلیردی ایشین آردی آغیت سؤیله یه نه
یاخچی چالغین کومادان چیخدی، هاچاغدان-هاچاغا
