شِه اِسبِه اِسبِه گیسِه رِ وا هَکِن
حِنا رِ تیم تیم وِنِه سَر لا هَکِن
شِه چین بَخِردِه دیم سَر او بَشِن
شِه سَختِ سالِ ما رِه دِریو بَشِن
تَکی تیناری  سِفره داری هاکِن
تاریکه شویِ وِسِه ماری هاکِن
وَنگ هاده آ پسر برو شو بَیِه
مِه ذَهلِه تاریکِ خِنِه او بَیِه
صِواحی سَر اِفتابِه ویشار هاکِن
هَر چی تِه دِل خانِه وِرِه بار هاکِن
دِنیا تِه دِلِّ گَزنا روش هاکِنِه
تِه لینگِ پِه اَگِر سِروش هاکنه
اَتّا سَبِد غِیرتِه دوشِ سَر بِل
مَردِمِ مِفتِ حَرفِ گوشِ سَر بِل
وا دَکِتِه لَمپایِ سو رِه بَیتِه
شو نِصفِ شو وِ چِشِ خو رِه بَیتِه
تَش هَیتِِه دِلِّ دَردِه چو بَزوئِه
هِنیشتِه مَلکِمیته رو بَزوئه
وَچونِ اَتّا اّتّا وَنگ هاکِردِه
خالی بِنِه رِ مَشتِ چَنگ هاکِرِده
گَهره سَرِه وَچونِ یاد بیاردِه
سِفرِه ی خالی نونِ یاد بیاردِه
دِنیا چِه روزِ خِشِ رو نکردِه
اَتّا گِدِر خِشی چِه سو نکردِه
غِمیرِه وِ گَلی رِه هی بیاردِه
اَسلی رِه وِ چِشِ پَلی بیاردِه
کی گِتِه مار وِنِه تِناری دَوِ
وِ روزو شو رِه بیقراری دَوِ
اِسا که تِه بِلندِ اِفرا بَهی
اَتّا پِسِر خِش قَد و بالا بَهی
اَتّا گِدِر شِه مارِ خاهون بَواش
پیتِه گِلی خِنِه ی  سامون بَواش