قبیرلر آلتیندا قوجا اؤلولرین چوروموش الیندن،
خیاوان‌لاردا فانتزی قیزجیغازلارین اوزون اینجه بارماق لارینا قدر
ساغ الیمیزین اوزرینده
مین‌لرجه انسانین بارماق ایزی وار
گؤروش ایزلری، خیانت ایزلری
الوداع ایزلری
طالعیمیز قهوه فینجان‌لاریندا دئییل
آلنیمیزین قیریش‌لاریندا یوخ
نوطفه باغلارکن، لعنتلیک بیزی یالقیز بوراخان
میلیون‌لارجا اسپرمدن باشلاندی فاجعه
اؤنجه اونلار
سونرا آنا تنیندن بئله تنها بوراخیلدیق
تنیمین بیر یئری سانجیر
اوره‌ییم دئییل یقین
کوره‌ییم ده دئییل
اوتوز ایلدیر گزیرم تاپانمیرام آرتیق
نه خنجر سالدیریلیب
نه دوز تؤکوب‌لر یارامین آخان یئرینه
داملا-داملا سوزور سؤزجوک‌لر آغزیمدان
هرگون بیر ذرّه من مندن آزالیر
هر گون بیر ذرّه بیز بیزدن آزالیر
بو نه طالعی‌دیر یازیلیب تنیمین تاپیلمایان یئرینه؟
بو نه سانجی‌دیر؟
منی اسپرم‌لر یالقیز بوراخمادان اؤنجه
کئچمیش حایاتیمدا بیری گؤردو ایسه
خاطیرلاسین،
گله‌جک حیاتیمدا آغیر گون‌لر گؤزله‌ییر منی...
