گئجه‌نین باغرینا سوزولن هایام
بولودلار چینیندن بویلانان آیام
گونش‌له ائکیزم آی‌لا قارداشام
گؤیون قونشوسویام اولدوزا تایام
آردیمجا دوزولوب مین سامان یولو
ساییشچی ذهنینده ساییلماز سایام
گوللری سوورولان آل گولوستانام
اوره‌یی یارالی تورکمن‌چایام
یاخیلیب آلنیما اؤلوم بویاسی
اؤلولر شهریندن یئتیشن پایام
گولله‌لر آچیلان خیابانلاردا
قانینا بویانان ایگید اوختایام
آدام‌سیز حسینم یاردیمچیم یوخدور
کربلا چؤلونده سونسوز هارایام
آتالار الینده اوغول نعشی‌یم
آنالار دیلینده سولان لایلایام.
کاظم نظری‌بقا
متولد 1348، اردبیل. مجموعه‌های منتشر‌شده:
«بر آن بلند سکوتستان»، «کلاغ» و...