دیلیم سوسور اوره ییمده نئچه گیلئی دولانیر
اودور کی کئفلی غزللر دیلیمده کئی دولانیر
گیله گیله کدرین کوءینه یینده میرواری لار
یاناغا آخماییر آنجاق گوءزومده هئی دولانیر
سولور بو پنجره نین گوللری ایشیق دادمیر
سیزه گونئی دولانیرسا بیزه گوزئی دولانیر
دونن او مجنونو گوردوم دئییردی اوز اوزونه
ندن دی سئوگی شه هرده سفئی سفئی دولانیر
ائله سیخیر بو شه هر کوکسومو بوگون سانیرام
بیر اولکه دوغما ایچینده بیری اوگئی دولانیر
باهار گلنده لالا گورجه یین خیال ائدیره م
اونازلی سئودیجه ییمدیر الینده مئی دولانیر
شکایت ائتمه یه سن سانما بیر سوزوم یوخدور
دیلیم سوسور اوره ییمده نئچه گیلئی دولانیر