...
چەوم لۆوجاو کی رووەیتە، لە دەرگا ما، نەهاتیتەو
دڵم ئاوارە بی لێیدا لە بەر پا ما، نەهاتیتەو
لە چەق دەرگا چەنی نشتم، وە هەرلا چەو بڕیم ئەمما
دڵم لە حەسرەت ئەیلا و ئەولا ما نەهاتیتەو
وەتی یێی رووژ ئەیەم، ئەمما ئەزانم کی دروو کردی
لە دڵ من هەر چنەو یێی داخ گۆورا ما، نەهاتیتەو
نەهاتی، دەم نەکردیتەو، چنەو شیرن بکەی حاڵم
دڵ من لە تەمای قەند و حەڵوا ما نەهاتیتەو
منم ئەو چۆڵە وشکەی کی قەڵەش هەڵگردیە لێیرە
چەوم لە حەسرەت یێی چۆڕ لە دەریا ما، نەهاتیتەو
لە ناو ئەی شەختە من بەردای لە گەرمای خۆت دەرم کردی
دوبەردت نەڕمیەت گیانم لە سەرما ما، نەهاتیتەو
چەنی وەل تو وەڕیهاتم تو چەت خستی وە ناو کارم
ئەرای من لێیرە هەر تەنیا تەقاڵا ما نەهاتیتەو
نەبی یێی کاروان رەد بووت و لێی چاڵاوە من دەرکەت
دڵم لە حەسرەت عشق زولێیخا ما، نەهاتیتەو
ئەرای شێتی وەک من کی چنەو کەفتە زوان مەردم
لە ئەی چەن ساڵە تەنیا ناو لێیلا ما نەهاتیتەو
پەکت ئەسڵەن نەکەفت و دایتەلی بیشۊن لەلام رووەیت
چەنی ئەی عاشقەت لێیدانە تەنیا ما، نەهاتیتەو
